ARZON UCHMOQCHIMISIZ? QO’SHNI AEROPORTLAR MUAMMOGA OSON YECHIM

Toshkentdan atigi 130km narida joylashgan Chimkent shahriga Olmozor metrosi yonidan har kuni 3 mahal (07:00, 12:00, 18:00) avtobus yo’lga qo’yilgan. Bilet 40 ming so’m, yo’lga 3-3.5 soat vaqt ketadi. Toshkentdan yo’lga chiqqan avtobus sizni Chimkentdagi vokzalga eltib qo’yadi. Vokzaldan aeroportgacha taxminan 10km. Vokzaldan yoki shahar markazidan aeroportga avtobusda (N12, 12A, 12B) 50 tengega (1200 so’mga) yetib olasiz. Avtobus ertalab 06:00 dan kechki 07:00 gacha ishlaydi. Tavsiyamiz – Yandex Taxi: qulay va tez. O’zbekistondan biroz qozoq tengesi (transport uchun) sotib olish esingizdan chiqmasin. Toshkentdan Chimkent aeroportiga xususiy taksilar yoki o’z mashinangizda ham borsangiz bo’ladi. Aeroport qo’riqlanadigan parkovkaga ega.

Toshkentdan Qozog’istonning Taraz aeroportigacha taxminan 300km. Toshkent – Taraz yo’nalishida ham har kuni avtobus qatnovi mavjud. Chipta narxi 75 ming so’m, manzilga komfort avtobuslarda o’rtacha 6 soatda yetib olasiz. Yoki Chimkent orqali yo’nalishli taksilardan foydalanishingiz mumkin. Agar o’z avtomobilingizda borsangiz, aeroport avtoparkida qoldirishingiz mumkin.

Bishkek xalqaro aeroporti Toshkentdan taxminan 630km masofada joylashgan bo’lib, har kuni 2x avtobus qatnovi yo’lga qo’yilgan. Toshkentdan chipta narxi 130.000 so’m, yo’lga esa o’rtacha 12 soat vaqt sarflaysiz. Agar o’z avtomobilingizda borsangiz, aeroport avtoparkida qoldirishingiz mumkin.

Toshkentdan Olmota aeroportigacha taxminan 800km masofa. Doimiy avtobus qatnovi yo’lga qo’yilgan bo’lib, reyslar soni bir kunda 4 marta. Chipta narxi 99.000 so’m, manzilga o’rtacha 16 soat vaqt sarflaysiz. Agar uzoq yo’l yurishni yoqtirmasangiz, Chimkent – Olmota yo’nalishida kunlik to’g’ridan-to’g’ri aviaqatnov amalga oshiriladi. Uchish vaqti 1 soatdan ozgina ko’p. Borish-kelish narxi o’rtacha $27 atrofida. Agar o’z avtomobilingizda borsangiz, aeroport avtoparkida qoldirishingiz mumkin.